Бугарскиот премиер Росен Железков денес изјави дека нема истрага за инцидентот со попречувањето на сигналот на авионот на претседателката на Европската комисија, Урсула фон дер Лајен, ниту пак извештаи за можен кибер или хибриден напад.

„Дел од методите за водење модерни војни вклучува таканареченото радио-електронско војување, што е пречки во радиофреквенцискиот спектар во воените зони. Овие пречки не се ниту хибридни ниту кибер закани“, изјави Железков денес во Бургас, пренесува порталот „Bnr.bg“.

Според него, пречките влијаат на ГПС сигналот од сателит речиси 20 километри над земјата и не се насочени во однос на еден или друг воздухопловен објект.

Како што вели тој, вакви работи се случуваат секој ден и нема ништо што контролата на воздушниот сообраќај во Бугарија не спроведува се според протоколот.

Бугарската влада вчера соопшти дека ГПС сигналот бил изгубен кога авионот на фон дер Лајен се приближил кон Пловдив во јужна Бугарија, принудувајќи ги контролорите на летање да се префрлат на системи за навигација на земја за да обезбедат безбедно слетување.

Инцидентот се случил додека фон дер Лајен била на четиридневна турнеја низ земјите-членки на ЕУ што граничат со Русија.

Во меѓувреме, портпаролот на рускиот претседател Дмитриј Песков изјави дека Москва не е вмешана во техничкиот дефект што се случил за време на слетувањето на авионот во кој се наоѓала претседателката на Европската комисија.