Владата на Австрија се соочува со значително зголемени пресметки за буџетската консолидација. Додека претходно се проценуваше дека треба да се заштедат околу 6,3 милијарди евра за да се избегне дефицитарна постапка од страна на ЕУ, сега таа сума речиси се удвојува. Како што истакна министерот за финансии, Маркус Мартербауер, во Буџетскиот одбор на парламентот, дефицитот, и покрај донесените мерки за стабилизација, ќе изнесува помеѓу 3,5% и 4% од БДП.

Ова значително ја надминува границата од 3% утврдена со Мастришкиот договор. За да се спротивстави на ова, владата ќе треба да донесе дополнителен пакет за консолидација, сличен по обем на веќе донесениот, изјави Мартербауер.

Истовремено, тој предупреди дека ова би можело дополнително да ја намали економската активност, што би создало т.н „ѓаволски круг“, во кој Владата би морала да воведе строги мерки за заштеда (намалување трошоци, зголемување даноци) за да го намали јавниот дефицит. Ваквите мерки би ја намалиле потрошувачката и инвестициите, што би довело до забавување на економскиот раст. Помал економски раст подразбира помали даночни приходи за државата бидејќи бизнисите и граѓаните заработуваат помалку.

Главна причина за зголемувањето на дефицитот се послабите економски прогнози. Кристоф Баделт, шеф на Фискалниот совет, кој самиот проценува дека се потребни дополнителни 4 до 5 милијарди евра за консолидација, очекува следните чекори да бидат објавувањето на економските прогнози на ВИФО и првите „ех-пост“ податоци од федералните покраини. Меѓутоа, најважна ќе бидe економската прогноза на Европската комисија во мај, врз основа на која Комисијата ќе ја ревидира буџетската ситуација на Австрија, истакна Баделт.

Министерот за финансии Мартербауер изјави дека веќе воспоставил контакт со финансиските референти на покраините. Во неколку покраини се очекува висок дефицит, а финансиската состојба на социјалното осигурување се влошила поради трендовите во вработувањето. Бидејќи за ЕУ е релевантен целокупниот јавен сектор, консолидацијата мора да биде заеднички проект, нагласи министерот.

Тој повторно се обиде да ги смири стравовите од можната дефицитарна постапка на ЕУ, велејќи дека не очекува зголемување на каматните стапки доколку Австрија убедливо докаже дека го намалува дефицитот. Дури и во случај на постапка, сите одлуки ќе останат во рацете на владата, само ќе биде неопходна координација со Брисел.
При дефицитарна постапка, заштедите во првата година нема да бидат толку драстични, но би следела постојана контрола од ЕУ. Првичните 6,3 милијарди евра би се намалиле на 3,9 милијарди, но на крајот од седумгодишниот период, вкупните заштеди би биле слични.

Мартербауер јасно истакна дека секое министерство ќе мора да придонесе за консолидацијата, а критериумите за распределба ќе бидат објективни.