Предлог – буџетот на Град Скопје за 2023 година е доставен до советниците од градскиот совет дури вчера, па ним им остануваат само шест дена да го разгледаат обемниот материјал за да бидат подготвени за седницата на која ќе се расправа за буџетот, која, како што информира советникот Горјан Јовановски од Зелен хуман град, ќе се одржи на 27 декември.

Предлогот ни е доставен вчеравечер, а седницата е закажана за 27 декември. Има многу рокови кои не се почитуваат – вели Јовановски одговарајќи на прашањето дали со тоа што предлог буџетот е доставен на неполна недела пред седницата се кршат законските рокови.

Советниците во Советот на Град Скопје многупати укажуваа дека се доцни со предлог-буџетот, дека немаат никаква информација за неговото подготвување, потсетуваа дека се работи за обемна материја за која треба време за да се разгледа, а и дека законот тоа го предвидува. Сега на советниците им останува сосема малку време да се подготват за да можат да го искажат својот став и да дискутираат за буџетот со кој ќе располага Градот во наредната година.

Буџетот на општината претставува годишен план на приходи и расходи со кои се финансираат работите и надлежностите на локалната самоуправа за една фискална, односно календарска година, која почнува на 1 јануари, а завршува на 31 декември. Неискористените одобрени средства со буџетот престануваат да важат на 31 декември во тековната фискална година што значи не можат да се префрлат во следната година.

Одговорен за подготвување на буџетот е градоначалникот, но исто така одговорност на градоначалникот е и неговото навремено доставување до Советот, како и за неговата реализација.

Буџетскиот календар пак претставува алатка со која се утврдуваат роковите за планирање и изготвување на буџетот на општината за наредната фискална година. Во периодот помеѓу октомври и декември календарот предвидува конкретни активности кои треба да ги преземат општините за да им се овозможи на граѓаните да се информираат и да се вклучат активно во подготовката и приоретизација на програмите и проектите во рамките на буџетот на општината.

Според буџетскиот календар, до 1 декември градоначалникот треба да го достави предлог буџетот до Советот, кон крајот на декември на седница на Советот да се донес буџетот за наредната година и од 1 јануари започнува новата буџетска година и неговото извршување.