Вицепремиерот и министер за транспорт Александар Николоски вечерва во емисијата „Клик плус“ на телевизијата „21“ рече дека километар од брзата пруга која тој ја заговара да се гради низ Македонија од српската до грчката граница, ќе чини околу 8,8 милиони евра.

Како што додаде тој, ова значи дека целиот проект ќе чини околу 1,8 или 1,9 милијарди евра.

„Првичната проценка е дека некаде 8,8 милиони евра по километар, финалното проектирање затоа што ќе одиме со заедничко проектирање и градба, тоа е тоа што сега модерниот свет го прави, да не работи еден проект, друг градба, туку тоа го спојуваме во едно“, рече Николоски.

Како што претходно се најавуваше, парите за изградбата на овој мегапроект власта ќе ги обезбеди од британски банки, преку гаранциите во вредност од шест милијарди евра што токму Николоски лани ги потпиша во Договорот за стратешко партнерство со Велика Британија.