Воениот фоторепортер Пол Лоу (61), кој известувал и од војните во поранешна Југославија, пред неколку дена бил пронајден мртов на популарна планинарска патека во Калифорнија, со рана од нож во вратот.

Според лондонски „Стандард“, синот на убиениот, Емир Лоу (19) бил виден како заминува со автомобил од местото на настанот, а подоцна учествувал во сообраќајна несреќа недалеку од местото на убиството, по што бил уапсен, соопшти полицијата.

Тој е обвинет за убиство и денеска се појави на прво судење во Калифорнија, соопшти окружното обвинителство на Лос Анџелес.

„Жртвата била прогласена за мртва на местото на настанот. Забележан е возрасен човек како се оддалечува од местото на настанот, а потоа учествувал во неповрзан сообраќаен судир неколку километри од тоа место. Тој е приведен во очекување на понатамошна истрага“, соопшти полицијата.

Одделот за воени студии на Кралскиот колеџ во Лондон, каде Лоу бил предавач, соопшти дека наградуваниот фоторепортер „многу ќе им недостига“.

За време на неговата долга кариера, Лоу покривал ударни вести ширум светот, вклучувајќи го падот на Берлинскиот ѕид, ослободувањето на Нелсон Мандела, уништувањето на чеченскиот главен град Грозни… Тој ја следел и војната во Босна и Херцеговина во 90-тите години.