Бројот на жртвите од уривањето на покривот на ноќен клуб во Санто Доминго се искачи на 231, објави министерот за внатрешни работи на Доминиканската Република.

„Потврдуваме дека во оваа несреќа животот го загубија 231 лице“, рече Фариде Рафул на прес-конференција, појаснувајќи дека 221 биле пронајдени мртви на местото на трагедијата, а десет повредени починале во болница.

Уште 12 повредени сè уште се хоспитализирани, а тројца од нив се во критична состојба.

Катастрофата, која се смета за најголема трагедија на векот во Доминиканската Република, го надминува бројот на загинати во пожарот во затвор во источниот дел на земјата во 2005 година, кога животот го загубија 136 затвореници.

Покривот на ноќниот клуб „Џет Сет“ се урнал во 00:44 часот по локално време на 8 април, кога стотици луѓе присуствувале на концертот на музичката ѕвезда Руби Перез – кој е меѓу жртвите на трагедијата.

Претседателот Луис Абинадер прогласи шестдневна национална жалост, притоа најавувајќи формирање на комисија од експерти, со учество на странски специјалисти, за да се разјаснат причините за несреќата.