Бројот на жртви од силниот земјотрес во источен Авганистан се искачи на 900, а 3.000 лица се повредени, соопштија денес локалните власти, додека спасувачките екипи го пребаруваат погоденото подрачје за преживеани.

„Повредените се транспортираат, па овие бројки можат значително да се променат“, изјави портпаролот на Националната дирекција за управување со катастрофи, Јусуф Хамад, според АП.

Тој додаде дека земјотресот предизвикал лизгање на земјиштето во некои области, блокирајќи ги патиштата, но дека повеќето се повторно отворени, а се работи на расчистување на другите за пристап до тешко достапните области.

Земјотрес со јачина од 6,0 степени според Рихтеровата скала го погоди планинскиот регион на Авганистан во недела навечер, а епицентарот на земјотресот бил недалеку од градот Џалалабад во близина на границата со Пакистан на длабочина од 10 километри.

Службениците изјавија дека куќите се срамнети со земја во областите во близина на границата на Авганистан со Пакистан.