Премиерката Ана Брнабиќ разговараше со премиерот на Холандија Марк Руте и премиерот на Луксембург Ксавиер Бетел и оцени дека нивната посета на Србија претставува единствен и многу важен политички настан, пренесува РТС. Брнабиќ во таа прилика посочи дека Белград е целосно посветен на дијалогот со Приштина. Таа додаде дека за Србија подеднакво е важно прашањето за безрезервна заштита и обезбедување на безбедноста на припадниците на српската заедница на Косово.

„Посветени сме на зачувување на мирот и стабилноста на Косово, како и на изнаоѓање решение во дијалогот, за што сведочи конструктивноста што српската страна континуирано ја покажува“, посочи Брнабиќ.

Таа посочи дека посетата на премиерите на Холандија и Луксембург покажува дека билатералните односи со тие две земји се многу добри, а нивното доаѓање во Белград особено го интензивира политичкиот дијалог. Брнабиќ рече дека со Холандија и Луксембург, кои се меѓу најважните економски партнери на Србија, има успешна економска соработка и прилив на инвестиции.

Според неа евроинтеграциите се надворешнополитички приоритет на Србија, како и дека поддршката на Холандија и Луксембург е од клучно значење за забрзување на овој процес, и ги информирала соговорниците за реформите што Србија ги презема на тој пат, особено во областа на правдата и слободата на медиумите и безбедноста на новинарите.

Соговорниците се согласија за важноста од зачувување на мирот и стабилноста на Балканот, како и за важноста на европската перспектива на Република Србија и на целиот Западен Балкан.