Околу 150 луѓе се вклучиле во потрагата по 21-годишна Британка која исчезнала во Камбоџа, на остров популарен за туристи, изјавил денеска висок полициски функционер.

Генералот Чуон Нарин, шеф на полицијата во провинцијата Преах Сиханук, рекол дека по Амелија Бембриџ трагаат нуркачи, членови на морнарница, локални доброволци и странци.

Таа последен пат биле видена во средата навечер, кога била на журка на плажа на островот Кох Ронг во југозападна Камбоџа, каде имало туристи од разни националности.

Нејзината чанта со телефон, пари и кредитни картички била најдена следното утро на околна плажа, а кога не се појавила за да се одјави од хостелот во кој престојувала, нејзиниот пасош бил пронајден во нејзината соба.

Чуон Нарин пројавил оптимизам за тоа дека таа би можела да биде најдена жива, пренесувајќи дека неколку странски туристи кои од порано исчезнувале, биле пронаоѓани живи и здрави бидејќи исчезнувале во џунглата.

Нарин рекол дека не му е познат ниту еден случај во кој некој странец бил убиен.

Весникот „Пном Пен Пост“, повикувајќи се на локалниот функционер, соопштил дека потрагата се спроведува во џунгла и во море.

Тој функционер рекол дека се сомнева оти Бембриџ се удавила, бидејќи ташната и била најдена кај карпа во близина на вода. Во потрагата по неа се користат глисери.

Братот и таткото на девојката се наоѓаат во Камбоџа за да помогнат во потрагата, пренесуваат британските медиуми. Семејството дознало за нејзиното исчезнување откако таа не се одјавила од хостелот.

Чуон Нарин рекол дека засега оние кои ја бараат немаат вести за тоа каде се наоѓа.

Кох Ронг, кој се наоѓа на околу 25 километри од брегот во Тајландскиот залив покрива површина од околу 78 метри квадратни.

Семејството на девојката информирало дека нејзиниот пат по Азија почнал на 27 септември, кога со авион стигнала во Виетнам.