Владата на Велика Британија денес објави дека вовела нови санкции против таканаречената руска „флота во сенка“, кои се однесуваат на 135 танкери за нафта, како и на две руски компании – бродарската компанија „Интершипинг Сервисиз“ и филијалата на Лукоил за трговија со нафта „Литаско Мидл Ист“, чие седиште е во Дубаи.

Танкерите за нафта се клучни за енергетскиот и нафтениот сектор на Русија, а британската влада вели дека тие се дел од флота одговорна за транспорт на товар во вредност од 24 милијарди долари (20,5 милијарди евра) од почетокот на 2024 година, пренесува Ројтерс.

Британскиот министер за надворешни работи, Дејвид Лами, изјави дека новите санкции дополнително ќе ја „распаднат“ таканаречената „флота во сенка“ на рускиот претседател Владимир Путин и ќе го исцрпат рускиот буџет за војна со Украина, која се состои од значителни приходи од нафта.

Британската влада објави дека компанијата „Интершипинг Сервисиз“ е одговорна за регистрација на бродови под знамето на Габон, што им овозможува да транспортираат стока во вредност до десет милијарди долари годишно, во име на руската држава.

Санкции беа воведени и врз компанијата „Литаско“, поради нејзината континуирана улога во испораката на големи количини руска нафта, според соопштението.