Британската полиција денеска соопшти дека 6.000 полицајци се подготвени за справување со уличните немири кои избувнаа по трагедијата во Саутпорт. За ова вчера пред граѓаните се обрати и градоначалникот на Лондон, Садик Кан и апелираше да се смират страстите.

Повеќе од 400 луѓе веќе се уапсени поради немирите што ја зафатија Британија, а кои избувнаа по трагедијата во Саутпорт, каде три девојчиња беа убиени во напад со нож минатата недела, пишува британскиот Телеграф.

Градоначалникот на Лондон, Кан, на платформата „Икс“ напиша дека насилството и немирите нема да се толерираат.

„Немирите, расизмот и насилството што можевме да ги видиме во последната недела низ целата земја се навистина шокантни. Свесен сум за извештаите на десничарските групи дека ќе нападнат одредени локации во Лондон и што можам да кажам е дека ако се прекрши законот треба да се биде свесен дека прекршителите ќе ги сносат последиците“, напиша Кан на „Икс“.

Тој истакна дека полицијата работи со општинските службеници и раководителите на локални организации за да се заштитат локациите кои потенцијално би можеле да бидат цел.