Велика Британија ќе ја удвои својата хуманитарна помош за Газа, така што денеска е соопштено дека ќе бидат извоени дополнителни 30 милиони фунти (34,5 милиони евра).

Британските власти повикаа и на целосно почитување на четиридневниот прекин на огнот кој стапи на сила изутрината.

„Дополнителни 30 милиони фунти ќе бидат издвоени за прва помош, како што се засолништа и медицинска опрема. Од витално значење е да се заштитат цивилите и ние ги истражуваме сите средства за испорака на помош во Газа, вклучително и по копно, море и воздух“, изјави министерот за надворешни работи Дејвид Камерон.

Лондон веќе издаде две транши од помошта, 10 милиони фунти (11,5 милиони евра), а потоа 20 милиони (23 милиони евра) на крајот на октомври.

Примирјето меѓу Израел и Хамас стапи на сила изутрината и треба да овозможи, покрај попладневното ослободување на 13-те заложници киднапирани од исламистичката група Хамас, да се донесе уште хуманитарна помош на палестинската територија.

Ова е резултат на договорот постигнат завчера меѓу Израел и Хамас, со посредство на САД, Катар и Египет.