Британија: Четири пропалестински активисти кои нападнаа воздухопловна база се обвинети за „заговор“
Четири пропалестински активисти се обвинети за „заговор“ откако упаднаа во британска воздухопловна база и испрскаа два авиона во знак на протест против поддршката на Лондон за Израел, соопшти во среда вечерта единицата за борба против тероризмот на полицијата.
Препорачано
Претходно вчера, британските пратеници со огромно мнозинство гласаа за забрана и означување на групата „Палестинска акција“, чии членови се одговорни за вандализмот, како терористичка. Домот на лордовите треба да гласа за ова прашање денес.
Ејми Гардинер-Гибсон (29), Џони Кинк (24), Даниел Џеронимаидес-Нори (35) и Луис Чиарамело (22) се задржани во притвор и се очекува денес да се појават пред суд во Лондон.
Тие се обвинети за „заговор“ за влез во забранета зона со цел да се наштети на безбедноста и интересите на Велика Британија и да се предизвика штета, се вели во соопштението на службата за борба против тероризмот.
Тие првично беа осомничени за „извршување, подготовка или поттикнување на извршување терористички акти“, но обвинителството на крајот процени дека „овие кривични дела не се поврзани со тероризам“.
41-годишна жена беше исто така уапсена под сомнение за „давање помош“ на активистите, но беше ослободена со кауција до 19 септември. Друг 23-годишен маж беше ослободен без обвинение.
Неколку членови на „Палестинска акција“ на 20 јуни упаднаа во Брајз Нортон, најголемата база на Кралските воздухопловни сили во централна Англија и испрскаа два воени авиони со црвена боја.
Полицијата ја процени штетата на 7 милиони фунти (8,10 милиони евра).
Групата соопшти дека ќе поднесе жалба против нејзината забрана и нејзиното наведување како терористичка организација.
Лондонскиот суд ќе започне со расправа за случајот во петок, а „Палестинска акција“ ќе биде поддржана од хуманитарни невладини организации, вклучувајќи ја и Амнести Интернешнл.
Доколку забраната за организацијата остане на сила, секој што ѝ припаѓа или ја поддржува ќе ризикува кривично гонење и казна до 14 години затвор.
ВИДЕО | Пропалестински активисти упаднале во воената база во Британија и вандализирале два авиони
