Европската Унија разгледува начини за користење на замрзнатите руски средства за поддршка на таканаречениот „заем за репарација“ за Украина, за да ги зајакне своите воени финансии и да го избегне ризикот од вето на Унгарија, изјавија за Ројтерс претставници блиски до проектот. Украина ќе го врати заемот за репарација само кога ќе добие компензација од Русија за штетата предизвикана за време на војната.

Концептот беше презентиран минатата недела од претседателката на Европската комисија, Урсула фон дер Лајен, во време кога американскиот претседател Доналд Трамп ја намалува директната американска воена помош за Киев. Фон дер Лајен рече дека заемот може да се организира врз основа на готовина поврзана со средствата на руската централна банка замрзнати на Запад по руската инвазија на Украина и нема да вклучува запленување на тие средства, што е „црвена линија“ за некои во ЕУ. Секој таков заем би морал да биде дизајниран за да се избегне вето од Унгарија, чии купувања на руска нафта оваа недела предизвикаа фрустрација во администрацијата на Трамп. Службениците вклучени во проектот рекоа дека може да се создаде нов механизам преку коалиција на држави кои се подготвени, наместо сите 27 членки на ЕУ, ако Будимпешта не сака да учествува. „Имавме првичен прелиминарен разговор за идејата за нов заем.

„Но, досега многу работи, вклучително и износите, не се јасни“, изјави за Ројтерс висок функционер на ЕУ. Околу 210 милијарди евра руски средства се блокирани во Европа. Повеќето веќе достасале и се конвертирани во готовина што се чува на сметка од белгискиот депозитар за хартии од вредност. ЕУ ја користи каматата од овие средства за да отплати заем од 50 милијарди долари за Украина, одобрен од земјите од Г7. Со оглед на тоа што повеќето средства сега се чуваат како готовина, износот на заработена камата е скромен. Идејата на која работи ЕУ сега би вклучувала замена на руските средства со обврзници без купон издадени од Европската комисија. Обврзниците би имале гаранции од сите земји членки на ЕУ или само од оние што сакаат да учествуваат, пренесува Кликс.ба.