Европската унија сè уште не одлучила за начинот на кој би можела да ги конфискува замрзнатите средства на Руската Федерација, со цел тие пари да ги пренасочи кон обновата на Украина, изјави денес неименуван европски функционер за новинарите во Брисел, додавајќи дека се разговара за правни прашања.

„Се разговара за правни опции на тема конфискација на замрзнати средства. Имаме многу прашања овде, ова е сложен процес“, рече тој, пренесе РИА Новости.

Во четвртокот, Европскиот парламент усвои необврзувачка резолуција со која се повикува на користење на рускиот државен имот „за репарации“ на Киев. Претходно, ЕУ, исто така, постојано изјави дека е подготвена да ги користи замрзнатите руски средства, вклучително и приватните, за обнова на Украина по конфликтот. Меѓутоа, ЕУ во моментов нема законодавен механизам за таква постапка.