Бразилија во понеделник објави дека Вашингтон сè уште не им одобрил визи на членовите на нејзината делегација што планираат да присуствуваат на Генералното собрание на Обединетите нации во Њујорк следната недела, во услови на сериозна криза во односите меѓу двете земји.

Тензиите во овие односи се на највисоко ниво, поради пресудата во судењето на поранешниот претседател на крајната десница на Бразил. Како одмазда за судењето – и тешката затворска казна – на Жаир Болсонаро, негов сојузник, американскиот претседател Доналд Трамп веќе воведе дополнителни царини од 50% за некои бразилски производи извезени на американскиот пазар.

„Владата на САД нè информираше дека сè уште не се издадени визи“, дека „тие се обработуваат“, објасни Мачелу Махота Виегас, директор на одделот за меѓународни организации во бразилското Министерство за надворешни работи, за време на прес-конференција.

Дипломатот истакна дека секое одбивање за издавање визи би претставувало „кршење на законот“.

Без да навлегува во детали за бројот на барани визи, тој увери дека е сигурен дека прашањето ќе биде решено во рамките на потребните рокови.

Стефан Дужарик, портпарол на генералниот секретар на ОН, Антонио Гутереш, го нарече одложувањето „загрижувачко“, но исто така нагласи дека „сè уште има време“ за издавање визи пред Генералното собрание.

Од своја страна, американскиот државен секретар Марко Рубио изјави за Фокс њуз во неделата дека новите санкции против Бразил ќе бидат воведени веднаш, без да даде детали.

„Ќе има најави во текот на следната недела за следните чекори што планираме да ги преземеме“, изјави министерот за надворешни работи.

Минатата недела, Федералниот Врховен суд (СТФ) го осуди Болсонаро на 27 години затвор за вмешаност во обид за државен удар.

Дури и пред да биде изречена пресудата, властите во Вашингтон ги поништија визите на судиите и на еден министер во централно-левичарската влада на претседателот Луиз Инасио Лула да Силва.