Брајан Мбеумо е нов играч во тимот на Манчестер јунајтед, откако потпиша договор со англискиот фудбалски гигант до јуни 2030 година, со опција за продолжување за 12 месеци, објави веста клубот од „Олд Трафорд“.

Според англиските медиуми трансфери на Мбеумо на Олд Трафорд вреди 72.000.000 фунти (фиксно), со можност таа бројка да се зголеми.

Камерунскиот интернационалец има 25 години и се приклучува на редовите на повеќекратните европски шампиони од Брентфорд, а спортскиот сектор и раководството на „Црвените ѓаволи“ очекуваат неговото доаѓање да ги подобри перформансите на тимот.

– Штом дознав дека се појави можност да потпишам за Манчестер јунајтед, морав да ја искористам и да потпишам за клубот од моите соништа, за тимот чиј дрес го носев како дете. Знам дека имам дух и карактер за да го достигнам следното ниво тука, учам од Рубен Аморим и играм покрај играчи од светска класа.

Сите ми кажаа за атмосферата што се создава тука и колку се големи плановите за иднината. Ова е огромен клуб, со неверојатен стадион и неверојатни навивачи. Сите сме навистина решени да се бориме за најголемите трофеи – рече пресреќниот Мбеумо.

Камерунецот претходно играше за францускиот тим Троа, а минатата сезона постигна 20 голови и имаше осум асистенции, носејќи го дресот на својот поранешен клуб.

Bienvenue, Bryan 🫡

— Manchester United (@ManUtd) July 21, 2025