Од МВР информираат дека е приведен измамник од Велес кој на интенрет продавал „благословени“ предмети.

-На 20.05.2025 во СВР Струмица, претставник на МПЦ – OA – Струмичка Eпископија пријави дека од почетокот на 2025 до 20.05.2025 на социјални мрежи се појавила фан страна со назив „Библиска Македонија“ каде се објавувале религиозни содржини, пораки и кратки исечоци од веќе објавени беседи на Владиката Јаков- велат од полицијата.

Исто така, според пријавеното, на страната почнала да се врши продажба на мали тегли со по 31 стих од Библијата, како и религиозни книги кои биле претставени како да се со благослов од Владиката Јаков.

Имено, за теглите, на купувачите им било кажувано дека седеле во манастирот во Ново Село и дека биле благословени од владиката. На тој начин, луѓето се доведувани во заблуда да ги купуваат таквите работи, а дека средствата од продажбата ќе бидат употребени во донации за топол оброк за лица бездомници. Веднаш по пријавата, со судска наредба, полициски службеници од СВР Струмица и СВР Велес извршиле претрес во домот на 33-годишниот Д.С. од Велес.

„При претресот се пронајдени и одземени пет мали тегли со пишан цитат од Библијата и други предмети за кои постои сомнение дека потекнуваат од кривично дело. Вележанецот бил уапсен и со него е извршен службен разговор, а со него на разговор била повикана и неговата 27-годишна сопруга“, велат од полицијата.

За овој настан со соопштение се огласија и од Струмичката епархија и остро ги осудија измамите на профилот Библиска Македонија, од каде се продавале „осветени тегли“ со стихови од Библијата, наводно благословени од Владиката Јаков.

-Со чувство на голема тага и огорченост го пишуваме ова соопштение за јавност со кое сакаме да ги информираме и предупредиме верниците за појавата на измамничка шема преку која лица под профилот Библиска Македонија продаваа „молитви во тегли“ и книги користејќи го името и авторитетот на викарниот Епископ Стобиски г. Јаков. Целосно ја имаме во предвид ранливоста на оштетените, кои од небрежност, не сакајќи поверувале на оваа измамничка шема, која е сѐ, само не во духот на православното христијанство. Сочувствуваме со болката, разбирајќи ја љубовта и довербата коишто луѓето ја чувствуваат кон Епископот г. Јаков, па недвосмислено стоејќи зад неговиот авторитет станале жртва на оваа грозоморна измама- велат од епархијата.

Оттаму исто така соопштија дека на оваа измамничка шема наседнале и родителите на загинатите и повредените од трагичната несреќа при опожарувањето на ноќниот клуб „Пулс“ во Кочани.

-Имено, до нас стигнаа информации од оштетените граѓани, дел од нив роднини и родителите на загинатите деца во пожарот во Кочани, коишто, скршени од болка и барајќи утеха, подлегнале на лагите кои им ги пишувале луѓето кои се кријат зад профилот Библиска Македонија и порачувале од спорните реквизити- се вели во соопштението.

Од МВР додаваат дека е запознаен јавен обвинител од Основното јавно обвинителство Струмица и по документирање на случајот, против брачниот пар ќе биде поднесена соодветна пријава.