Бирото за метрологија и Државниот пазарен инспекторат под закрила на Министерството за енергетика, рударство и минерални суровини, потпишаа договор за соработка, според кој, ќе се тестира квалитетот на течните горива.

Министерката Божиновска истакна дека примарна цел на овој договор за соработка е заострување и зголемување на бројот на контроли за квалитетот на течните горива, кој ќе обезбеди поголема сигурност за потрошувачите.

„Со овој потег, државата праќа јасна порака: неквалитетните горива немаат место на македонскиот пазар. Потрошувачите добиваат квалитет и сигурност, додека институциите покажуваат дека се посветени на повисоки стандарди и подобра заштита на јавниот интерес“, додаде Божиновска.

Инспекциските тимови за анализа на квалитетот на горивата ќе ја користат лабораторијата за мострирање и тестирање во рамки на Бирото за метрологија, а ќе вршат и вонредни инспекции.