Глобалната консултантска фирма од САД, Бостон Консалтин Груп, разгледува планови за преселување на околу 25% од палестинското население во други земји, вклучително и Сомалија, како дел од моделот за реконструкција на повоената Газа, објави Фајненшел Тајмс.

Во февруари, американскиот претседател Доналд Трамп предложи преселување на повеќе од два милиони Палестинци од Газа во соседните земји, со цел енклавата да се претвори во „блискоисточна ривиера“.

Израелскиот премиер Бенјамин Нетанјаху ја пофали идејата и во четврток изјави дека Израел ќе изврши целосна воена контрола врз Газа, по што управата ќе ја преземе преодна арапска влада.

Моделот на БЦГ вклучуваше преселување на околу една четвртина од населението на Газа во неколку земји, вклучително и Сомалија и отцепениот регион Сомалиленд, и покрај граѓанскиот конфликт и тешката сиромаштија во тој дел од Африка.

Вашингтон, според „Фајненшл тајмс“, одржал прелиминарни разговори со Сомалија како дел од поширок договор што би вклучувал отворање на американска воена база во замена за признавање на независноста на регионот. Прифаќањето на раселените Палестинци беше една од точките на преговорите.

БЦГ го разви моделот во март, работејќи за група израелски бизнисмени кои изработуваа планови за Газа по војната. Планот вклучуваше неколку сценарија и проценки на трошоците за „програма за привремено преселување“.

Фирмата наводно ги доставила овие податоци до американската администрација и други „релевантни засегнати страни“, а се предвидуваше дека повеќето раселени Палестинци нема да се вратат.

БЦГ подоцна се дистанцира од контроверзниот проект и го отпушти персоналот што работеше на него.

Клучните земји во регионот, како и голем број европски сојузници на Вашингтон – вклучувајќи ги Франција, Шпанија и Германија – одбија да учествуваат во планот за преселба, а Обединетите нации изјавија дека таквата мерка би претставувала етничко чистење.