Организаторите на бојкотот на продавниците во Босна и Херцеговина најавија нов бојкот од 21 февруари до 7 март, со тоа што е проширен списокот на субјекти планирани за бојкот. Овој пат, покрај продавниците за малопродажба, автосалоните и автоделовите, ќе бидат бојкотирани и набавките на недвижен имот, градежни материјали, продавници за мебел, продавници за облека и обувки, продавници за железарија, продавници за домашни миленици, туристички агенции и аптеки, информира Кликс.ба.

Некои од споменатите продавници тешко ќе се бојкотираат, како аптеките, со оглед на тоа дека се работи за здравје, додека одредени продавници, како автосалоните и продажбата на недвижности, мнозинството граѓани ги „бојкотираат“ речиси цел живот. Инаку, првиот бојкот на продавниците во Босна и Херцеговина беше одржан на 31 јануари и беше најуспешен, но официјалните податоци на даночната управа на ФБиХ покажуваат дека тој е далеку од успешен. После тоа се одржа дводневен бојкот, но сè уште нема видлив ефект.