Болничарката која се инфицираше со конго-кримска треска ќе се лекува со лекот Рибавирин, кој пристигна вчера во државата, информираат од Клиниката за инфективни болести и фербилни состојби. Нејзината состојба е стабилна со повремено покачена температура, а досега ниту еден од вработените на Инфективна кои беа под медицински надзор нема пријавено симптоми.

Лекот кој е единствен на располагање во тешки клинички форми на болест е пристигнат во државата во текот на вчерашниот ден. Исто така вчера имаше и веб-конзилијарни состаноци со колеги кои ја следат оваа болест во светот и имаат огромно искуство – се наведува во соопштението.

Пациентката е во стабилна состојба, со повремено покачена температура, а од Клиниката за инфективни болести велат дека по појавата на првиот случај на конго-кримска треска после многу години, сите здравствени институции во државата реагирале навремено и координирано.

Лабораториските анализи на крвта на пациентката се следат дневно и се ординира терапија. Од вработените на Клиниката за инфективни болести кои беа под медицински надзор ниту еден до сега нема пријавено симптоми на болест, се додава во соопштението.

Болничарката се зарази со болеста преку 27-годишната девојка од штипското село Кучица која почина. На нејзиното тело задржан бил само еден час, што укажува на потентноста на вирусот и неговата сериозност. Од моментот на првите тегоби до смртниот исход на младата жена, поминале шест дена, но симптомите кај неа биле неспецифични, како температура, болки во мускулите и повраќање.