Градоначалникот на Карпош, Стефан Богоев официјално го отвори турнирот во мал фудбал „Оливер Соколов – Сокол” на фудбалското игралиште „Сокол” во ООУ Христијан Тодоровски Карпош во Карпош 1.

„Вложуваме во маалскиот живот и во здрави генерации за младите да спортуваат и да не одат по пороци. Да не дозволиме да се извалка името на овој турнир преку навреди и да го задржиме спортскиот дух, изјави Богоев.

На Сокол му беше оддадена почит со едноминутно молчење пред стартот на натпреварот помеѓу легендите на ФК Вардар и легендите учесници на Сокол.

На турнирот се пријавени 48 екипи, а победникот ќе се знае на крај од септември. Вкупен награден фонд изнесува преку 700.000 денари. Победничкиот тим ќе освои 200.000 денари, поразениот во финалето 100.000, третопласираната екипа 50.000 денари, а четвртопласираната 10.000 денари.

Обезбедени се и индивидуални награди од спонзори и организаторите, а на отворањето излегоа децата од специјалната олимпијада на кои им беа подарени 30.000 денари.