Околу 3.900 од најбогатите луѓе во Германија, секој со најмалку 100 милиони долари нето вредност, сега поседуваат повеќе од една четвртина од вкупното финансиско богатство на земјата, според Boston Consulting Group (BCG). Нивниот имот, како што објави агенцијата DPA, вреди нешто помалку од три милијарди долари вкупно.

Списокот на супербогати се прошири за 500 имиња од минатата година, а нивниот вкупен имот се зголеми за 16 проценти. Поголемиот дел од зголемувањето дојде од меѓународните берзи.

Во нов извештај, BCG проценува дека вкупното бруто богатство на тие луѓе во Германија достигнало 22.900 милијарди долари минатата година. Од тоа, 11.800 милијарди се во недвижнини и други материјални средства, а 11.100 милијарди се финансиски средства, како што се банкарски депозити, хартии од вредност, акции во пензиски фондови и готовина.

Супербогатите поседуваат 27 проценти од финансиските средства во Германија, околу 2.990 милијарди долари, но и 2.200 милијарди обврски, претежно кредитни. Бројот на милионери од долари се зголеми за 65.000 во однос на претходната година, на 678.000, а извештајот покажува дека колку пониско е поединецот на листата на богати, толку побавно го зголемува својот имот.

Според извештајот за минатата година, Германија е трета во светот по бројот на супербогати, зад САД со 33.000 и Кина со 9.200 луѓе.