Ангел Самараков, личниот обезбедувач на премиерот Христијан Мицкоски и припадник на шестата управа на МВР (обезбедување на ВИП личности) е во триесетдневен притвор под сомнение дека одал службена тајна, но целата постапка е завиена во конспиративност и многу неодговорени прашања.

Како Самараков добил пристап до документи од истрага што ги споделил со трето лице, со оглед на тоа што на неговото работно место во шестата управа немало такви документи, дали некој му ги дал или пак тој ги добил кога бил инспектор во СВР Велес? На кого требало да му ги продаде за 50 илјади евра и кој воопшто би бил заинтересиран да плати толку многу пари за да добие документи што ќе ги објавува на социјалните мрежи? Нема информација како е дојдено до информацијата дека овие документи за некого „вределе“ 50 илјади евра и бил спремен да ги плати, ниту пак дали некој е уценуван. Јавноста уште не е информирана ни за кој предмет се однесувале документите, но Обвинителството првично демантираше дека се работело за службени тајни давани на нарко-групата од Грчец.

Ниту од МВР ниту од Обвинителството не одговараат на овие прашања на „Слободен печат“ ниту пак информираат кој предмет бил толку скап влог за некој да сака да искешира 50 илјади евра за влијание врз предметот.

Непознато е и дали документите пред да стигнат во возилото на паркингот каде што бил фатен Самараков како ги покажува на друго лице за кое исто така се шпекулира дека е поранешен обезбедувач на ВИП лице, поминале и низ други раце. Ова лице што требало да ги прими документите, во истрагата на МВР и Обвинителството има статус на сведок, а не на осомничен.

Осомничениот како службено лице, вечерта на 30.3.2025 година на паркинг просторот пред хотел во Велес се сретнал со неповикано лице – сведок во постапката и му покажал службени документи на МВР, што претставуваат службена тајна. Притоа му дозволил на сведокот истите да ги снима, кажувајќи му кој документ за што се однесува.

На овој начин, осомничениот од користољубие, а со цел да бидат објавени на социјалните мрежи, сторил достапни службени документи што претставуваат службена тајна, со цел да прибави паричен износ од 50.000 евра од лицето за кое се однесувале документите, информираа од Обвинителството.

За кривичното дело одавање службена тајна, казната затвор што е предвидена во Кривичниот законик е најмалку една година. Но, Самараков во моментов не би можел да делува сам без други да го снабдат со документите, а тоа може да се заклучи од неговата позиција во МВР бидејќи таму не се водат истраги.

Министерот за внатрешни работи Панче Тошковски вели дека ова е еден од случаите каде МВР покажува дека неселективно се бори против криминалците во своите редови. Тој информираше дека самиот оддел за внатрешна контрола при МВР е тој што ја почнал истрагата и претреси во нејзините рамки биле вршени и кај други полициски службеници. Најверојатно тие претреси се вршени кај полициски службеници во полициска станица Велес, каде Самараков работел пред да стане обезбедувач или возач на премиерот Христијан Мицкоски.

-Многу кривични пријави во минатото биле поднесени против криминалците во редовите на Министерството за внатрешни работи. Така е постапено и во овој случај. Одделот за внатрешна контрола во рамки на спроведување на истрага, по добивање на информации во рамки на одделот известил надлежен јавен обвинител кој издал наредба да бидат преземени дејствија истата вечер.

По спроведување на предметната акција, Одделот за внатрешна контрола изврши повеќе претреси кај полициски службеници од страна на Одделот за внатрешна контрола. Притоа најдени се одредени докази во насока на стореното кривично дело.

Понатаму сакам да им порачам на сите недобронамерници и предавници на родот свој, односно криминалците во Министерството за внатрешни работи дека неселективно и бескомпромисно ќе се бориме против нив. Македонските граѓани заслужуваат полиција која што ќе ги штити, а не што ќе ги рекетира, изјави министерот Тошковски.

Телевизија „Телма“ објави дека против Самараков во периодот од септември 2020 до декември 2024 имало неколку претставки за неговата работа како инспектор и полицаец.

Во период од септември 2020 година до декември 2024 година, во Одделот за внатрешна контрола, криминалистички истраги и професиoнални стандарди при МВР се добиени четири претставки против лицето А.С. за кое што по извршени проверки е констатирано дека две се основани и од страна на Одделот се поднесени предлози за поведување постапка за утврдување одговорност за повреда на работниот ред и дисциплина, одговориле од МВР за „Телма“.

Денеска „Слободен печат“ праша во МВР како завршиле овие дисциплински постапки но одговори не добивме. Министерот Тошковски не одговори како обезбедувачот добил пристап до службени тајни од истрага кога такви нема во одделот во кој тој работел.

-Во овој момент не би сакал да откривам детали од истрагата, сите прашања се поврзани со самата истрага. Кога ќе имаме потребните информации ќе ги споделиме со јавноста. Сите во МВР се вознемирени кога гледаат дека некој криминалец се прикривал со униформа, без разлика дали таа униформа е тактичка, свечена или униформа на одделот за обезбедување имот и лица, рече Тошковски.

Самараков според потврдени информации на „Слободен печат“ е вработен во Министерството за внатрешни работи од 5 октомври 2015 година. Со решение од 11.07.2016 година бил распореден на работно место „помлад инспектор“ за општ криминалитет во СВР Велес. На работното место на кое бил распореден имал статус на полициски службеник кој вршел полициски работи согласно Законот за полиција. Во повеќе наврати го тужел Министерството за внатрешни работи зашто не му исплаќале бонуси, ноќен труд, хранарина и други трошоци што му следувале по закон и тужбите завршувале во негова полза. Активен бил во полицискиот синдикат каде како член се среќавал со пратениците на ВМРО-ДПМНЕ во Собранието.