Кинеските власти ги повикаа кинеските компании да избегнуваат користење на процесорите H20 на американската технолошка компанија „Енвидиа“ (Nvidia), особено за владини цели, објави денес Блумберг њуз, повикувајќи се на луѓе запознаени со ова прашање.

Властите испратија известувања до голем број компании со кои ги обесхрабрија да ги користат помалку напредните процесори, а директивата конкретно ја отфрла употребата на Nvidia H20 за каква било работа од страна на државни претпријатија или приватни компании поврзани со владата или националната безбедност, се вели во телеграмата.

Ројтерс не можеше веднаш да ја потврди информацијата. „Енвидиа“ не одговори веднаш на барањето за коментар по работното време.

„Енвидиа“ објави во јули дека нејзините производи немаат „задни врати“ што би можеле да овозможат далечински пристап или контрола, откако Кина изрази загриженост за потенцијални безбедносни ризици од чипот за вештачка интелигенција H20 на компанијата.

Американскиот претседател Доналд Трамп изјави во понеделникот дека може да ѝ дозволи на „Енвидиа“ да ѝ продава на Кина верзии на нејзиниот напреден графички микропроцесор од следната генерација, „Блеквел“, и покрај загриженоста во Вашингтон дека Кина би можела да ги искористи можностите на американската технологија за вештачка интелигенција во корист на својата војска.

Најнапредниот чип што „Енвидиа“ моментално има дозвола да го продава во Кина е H20, кој е базиран на постарата платформа Hopper на компанијата. Администрацијата на Трамп минатиот месец даде зелено светло за извоз на чипот H20 за вештачка интелигенција во Кина.

Минатата недела администрацијата на Трамп, исто така, потврди невиден договор со „Енвидиа“ и AMD за давање на американската влада 15% од нивните приходи од продажба на некои напредни чипови во Кина.