Турскиот претседател Реџеп Таип Ердоган денеска ќе ја посети Белата куќа за прв пат по шест години, носејќи со себе серија договори насочени кон санирање на затегнатите односи меѓу двете членки на Северноатлантскиот договор – Турција и САД, пишува Блумберг.

Се очекува денешната средба со американскиот претседател Доналд Трамп да ѝ го отвори патот на Турција да купи сè, од борбени авиони „Локид Мартин“ и авиони „Боинг“ до течен природен гас во вредност од над 50 милијарди долари, според турски претставници, кои побараа да не бидат идентификувани бидејќи договорите сè уште не се финализирани.

Turkish President Recep Tayyip Erdogan to visit White House for first time in 6 years with deals to repair US-Turkey ties https://t.co/NcO5uhu7h6

— Bloomberg (@business) September 25, 2025

Според телевизијата, Ердоган го гледа состанокот како шанса за поправање на односите кои се затегнати поради купувањето руско оружје, дипломатските спорови и царините од двете страни. Турција сè уште зависи од американската воена и дипломатска поддршка за да го одржи своето регионално влијание, а инвеститорите ја гледаат нејзината улога во западниот сојуз како клучна за растот на најголемата економија на Блискиот Исток.

Очекувањата за затоплување на односите со Вашингтон ги поттикнаа турските пазари, а државниот долг и акциите беа поттикнати од најавата на Трамп за посета на Белата куќа минатата недела.

„Ердоган сака да го искористи претседателствувањето на Трамп за да ги преобликува и подобри односите меѓу Турција и САД, со фокус на подобрување на одбранбените врски“, рече Емре Пекер, директор на Евроазија Груп Европа во Лондон.

„Договорите за енергија и одбрана што ги бара Ердоган се клучни столбови на заемно корисен, трансакциски однос што ќе го привлече и интересот на Трамп за склучување договори“, додаде тој.

Двајцата лидери поминаа долг пат од нивната тешка средба во Белата куќа во ноември 2019 година. Откако Трамп претходно истата година вети дека ќе ги повлече трупите од Сирија, Турција започна воена инвазија против курдските сили поддржани од САД, што го натера Вашингтон да воведе санкции врз неколку турски министри.

Алијансата за малку избегна колапс кога тогашниот потпретседател Мајк Пенс посредуваше во прекин на огнот, дозволувајќи им на силите поддржани од САД да се оддалечат од турската линија на оган.