Опозициската ВМРО-ДПМНЕ е задоволна дека во Извештајот на Европската комисија (ЕК) е нотирано дека ја блокирала работата на Собранието, бидејќи блокадите биле за да ги алармираат меѓународните институции и да спречи власта да носи закони по скратена постапка и да го злоупотребува европското знаменце. За владејачката СДСМ, Извештајот потврдил дека опозицијата е кочничар на реформите и на европскиот пат на Македонија. Злоупотребата на европското знаменце за власта е алиби, бидејќи насушно било потребно носење закони во интерес на граѓаните.

Збирно, ова се позициите на власта и на опозицијата за забелешките на ЕК во Извештајот во делот на работата на Собранието, а за кои повторно одговорноста ја префрлаат на другата страна. Претседателот на Собранието Талат Џафери, иако го доби Извештајот од евроамбасадорот Дејвид Гир, не се произнесе за забелешките во него.

Главните забелешки во извештајот на ЕК за Собранието се политичката поларизација, блокадата на опозициската ВМРО-ДПМНЕ, прекумерна и несоодветна употреба на европското знаменце, недостиг на меѓупартиски консензус, зголемување на процентот од 38 на 58 на носење закони по скратена постапка, како и недонесување на новиот деловник.

– Македонија го доби историски најлошиот извештај од Европската комисија. Извештајот за 2023 година констатира дека нема напредок во делот на прашањето за активната блокада. Задоволен сум што тоа е нотирано, затоа што ние како пратеничка група со активната блокада што ја спроведувавме во Собранието, во ниту еден момент не ги спречивме битните процеси и закони за граѓаните. Целта беше да се спречи носењето закони по скратена постапка со кои власта сакаше да ја заобиколи демократската процедура за дебата. Извештајот констатира дека има зголемување на процентот на донесување закони по скратена постапка од 38 на 58 проценти или од 165 закони од јануари 2022 до јануари 2023 година, 86 закони се донесени по скратена постапка, а само 51 се во редовна постапка. Преку активната блокада сакавме да го насочиме вниманието, особено на меѓународните институции, за злоупотребата на европското знаменце на закони што воопшто немаат никаква врска со европската регулатива и ваквите малверзации станаа повидливи за меѓународните претставници – изјави Никола Мицевски, координатор на пратеничката група на ВМРО-ДПМНЕ.

Обвинувањата дека опозицијата е виновна за Извештајот, за Мицевски се несериозни. Тој смета дека доколку и по Извештајот, власта не може да ги види забелешките, и злоупотребите што ги прави ќе треба подолго време да бидат во опозиција. Мицевски обвини и дека премиерот Димитар Ковачевски и министерот за надворешни работи Бујар Османи избегале од соочување со извештајот.

Пратеникот од СДСМ Миле Талевски смета дека Извештајот на ЕК потврдил дека ВМРО-ДПМНЕ и Христијан Мицкоски се кочничари на европскиот пат и на реформите на земјата.

– Поразително за пратениците од ВМРО-ДПМНЕ е дека во Извештајот е нотирано оти главната опозициска партија активно ја блокираше парламентарна работа што беше значајна пречка за напредокот. На ова укажувавме и баравме ВМРО-ДПМНЕ и Левица да не го кочат напредокот на земјата, реформите и европскиот пат. Сега тоа го бара и самата ЕУ. Но, и покрај опструкцијата на опозицијата, земјава продолжува да ги исполнува условите на патот кон ЕУ. Имаме прогрес од 81 отсто од поглавјата, нема назадување во ниту едно поглавје – вели Талевски.

Талевски додаде дека во Извештајот нема делови како во времето на ВМРО-ДПМНЕ – за мешање во судството и дека нема уназадување. За критиките за злоупотреба на европското знаменце и за носење закони на брза лента, Талевски повтори дека најексплицитно се нотирани блокадите на опозицијата.

– За забелешката на законите со европско знаменце секогаш имало директиви што биле запазени од побарувањата од ЕУ. Да бидеме реални, ние како власт секојдневно се соочувавме со опструкции. Државата мора да оди напред и мораше да се најде начин како тие закони во интерес на граѓаните да бидат донесени што беше насушно потребно – рече Талески.

Од Коалицијата „Европски сојуз за промени“ велат дека ова е најнегативниот Извештај.

– Подолго време предупредуваме дека за Владата не е примарен фокус интеграцијата во ЕУ, бидејќи таа е зафатена со бизнисот на игрите на среќа, како и со зголемување на нивото на корупција – велат од Европски сојуз за промени.

И власта и опозицијата се надеваат дека носењето на новиот собраниски Деловник ќе оневозможи блокада на Собранието.

Во документот од ЕК се наведува и дека Собранието и Владата се обврзаа да започнат и да ги спроведат како приоритет релевантните уставни измени со цел во Уставот да се вклучат граѓани што живеат во границите на државата и кои се дел од други народи, како Бугарите. Дека европското знаменце треба да се користи кога е директно поврзано со донесувањето закони чија главна цел е усогласување со правото на ЕУ, а не за кратење на јавната дебата за важни прашања. Генерално, дека правната рамка останува соодветна за одржување демократски избори во Северна Македонија, но се напоменува дека не бил постигнат напредок за решавање и имплементација на вонредните препораки од Канцеларијата за демократски институции и човекови права на ОБСЕ (ОДИХР) и Венецијанската комисија. Повторно се забележува дека изборното законодавство треба сеопфатно да се ревидира за да се решат недоследностите на навремен, инклузивен и транспарентен начин.