Судскиот спор помеѓу ЗК „Пелагонија“ и ЈП „Стрежево“, тежок над 1,2 милиони евра и денеска беше во фокусот на вниманието на битолската јавност.

Додека ЗК „Пелагонија“ реагира на двојните стандарди на Основниот суд на Битола, кој го прифатил барањето на ЈП „Стрежево“ да ја симни блокадата на жиро-сметката на претпријатието, од ЈП „Стрежево“ се жалат дека доколку биде активирана блокадата ќе биде доведено во прашање нормалното работење на претпријатието и егзистенцијата на над 250 вработени.

-На 1 август во екот на сезоната за наводнување и испорака на вода за граѓаните од Битола од околу 450 л/с и во период кога имаме најголеми трошоци, и покрај препораката на Владата за компензација со испорачана вода, и покрај тоа што редовно им испорачуваме вода за наводнување за нивните површини како и вода за нивните фарми, неочекувано и од само нив познати причини, ЗК „Пелагонија“ се одлучија да ја блокираат сметката на Стрежево – Битола.

Преку блокирањето на сметката се загрозува ликвидноста на „Стрежево“, претпријатие формирано од јавен интерес и институција која значи живот за регионот. На овој начин сериозно се нарушува нормалното функционирање на водоснабдувањето со вода за пиење на Општините Битола, Могила, Новаци, снабдувањето со сурова вода на РЕК „Битола“, индустријата, индивидуалните земјоделци, како и исплатата на тековните трошоци и инвестиции.

Треба да споменеме дека со овој чин се загрозува егзистенцијата на над 250 вработени во претпријатието и вработените се ставаат во крајно незавидна положба.

По блокирањето на сметката, ние ги презедовме сите законски и правни мерки кои ни стојат на располагање и доставивме барање до Основниот суд во Битола за одлагање на извршувањето, од причини што „Стрежево“ е институција од големо значење за регионот и државата. Судот сосема разбирливо и очекувано за нас, нашето барање го прифати и сметката е одблокирана.

По прифаќањето на нашето барање за одблокирање на сметката од страна на Основниот суд во Битола, ЗК „Пелагонија“ поднесе жалба до Апелациониот суд во Битола, кој во наредните денови треба да се произнесе за жалбата на Комбинатот, истакна директорот на ЈП „Стрежево“ Менде Граматковски.

Инаку, ЈП „Стрежево“ по основ на судска пресуда на ЗК „Пелагонија“ досега има исплатено на име на главен долг 60.831.254 денари, камата од 45.184.139 денари и трошоци на постапката од 903.538 денари, а вратени се дел и од каматите во износ од над 19 милиони денари.

Во овој момент „Стрежево“ по пресудата му должи на ЗК „Пелагонија“ помалку од 26 милиони денари од вкупно 45 милиони денари камата, а сите други долгови се во целост исплатени, додава Граматковски.

На ваквите забелешки од страна на ЈП „Стрежево“, од ЗК „Пелагонија“ со соопштение возвратија дека Основниот суд Битола во случајот со ЗК „Пелагонија“ и „Стрежево“ има двојни стандарди.

-ЗК „Пелагонија“ трпи штети од двојните стандарди на Основниот суд Битола. Работата на најголемиот производител на пченица што е стратешки производ во Македонија е попречена од одлуката на Основниот суд Битола. Ова е уште еден случај што сведочи за недостаток на правна сигурност што го турка ЗК „Пелагонија“ во загуби.

Основниот суд во Битола во 2019 година, кога ЗК „Пелагонија“ беше во есенската сеидба, дозволи извршување на средства од нашата сметка која беше блокирана повеќе од 60 дена. Тогашната одлука на Основниот суд Битола не го прифати нашето барање за одлагање на извршувањето и покрај тоа што бевме во период на сеидба на пченица како стратешки производ на Македонија. Во такви околности постоеше опасност извршувањето да влијае на доцнењето на сеидбата како и набавките за наредната година да влијаат на квалитетот на нашето производство.

Нејасно е како истиот суд денес во 2023 година постапува сосема обратно од неговата одлука во 2019 година и носи одлука со која го прифаќа барањето за одложување на извршувањето на ЈП „Стрежево“ кон ЗК „Пелагонија“ и тоа во експресен рок од само 30 минути.

Која е методологијата на процена на Основниот суд во Битола, кој и покрај правосилните пресуди во корист на ЗК „Пелагонија“ и по вторпат носи одлука со која се нанесува директна штета на најголемиот производител на храна во Македонија.

Секоја година ЗК „Пелагонија“ се соочува со сериозни проблеми во оперативното работење предизвикани од несовесното функционирање на ЈП „Стрежево“. Двојните стандарди на Битолскиот суд и непостоењето на правна сигурност се исто така причина за пречките во производството и снабдувањето со основната прехранбена суровина на цела држава, се вели во соопштението на ЗК „Пелагонија“.

-Најголемиот производител на храна во нашата држава, ЗК „Пелагонија“ АД Битола над 7 години трпи сериозни штети од недомаќинското работење на ЈП „Стрежево“. Над седум години раководството на ЈП „Стрежево“ не ги почитува ниту една од постигнатите спогодби за меѓусебна соработка на рамнопправни односи. Дотолку повеќе што во 2019 година при постигната спогодба токму ЈП „Стрежево“ ја блокира беспредметно сметката на ЗК „Пелагонија“ и тоа во период на есенска сеидба која е од клучен интерес за финансиската состојба на Комбинатот.

– Сакаме да ја информираме јавноста и посебно граѓаните на Битола и цела Пелагонија дека одговорноста за водоснабдувањето на градот е надлежност на ЈП „Стрежево“, ЗК „Пелагонија“ е економска гордост на Битола и регионот, но ние веќе не можеме да дозволиме да работиме на штета на нашата компанија. Одговорноста за нерешавањето на проблемите на ЈП „Стрежево“ е само во раководството на ЈП „Стрежево“. Искрено нека одговори раководството зошто ја блокира ЗК „Пелагонија“ цели 60 дена во 2019 година, за време на сеидба на пченица? Колку затезни камати наплати ЈП „Стрежево“ од ЗК „Пелагонија“? Колкава фактура покажа за 2015 година кога не испорача вода и дали истата ја наплати од ЗК „Пелагонија“?-прашуваат од најголемиот производител на храна во нашата држава, ЗК „Пелагонија“ АД Битола.

Инаку, проблемот меѓу „Стрежево“ и ЗК „Пелагонија“ датира од 2015 година, кога се појави свлечиштето кај село Драгарино и го оштети главниот доводен канал за вода, преку кој се врши наводнување на 20.200 хектари обработливи земјоделски површини од Пелагонија и испорака на вода за граѓаните на општините Битола, Могила и Новаци, и цевководот Г-О, со кој се врши снабдување со сурова вода на термоцентралата РЕК „Битола“ и индустријата.

Во 2016 година „Стрежево“ беше тужено од ЗК „Пелагонија“ за наводно претрпена штета во 2015 година. Основниот суд во Битола пресуди во корист на ЗК „Пелагонија“. На оваа пресуда „Стрежево“ се жалеше до Апелациониот суд во Битола, кој во мај 2017 година донесе решение со тоа што жалбата на „Стрежево“ беше усвоена и предметот беше вратен на првостепениот суд на повторно судење.

Во јуни 2021 година Основниот суд донесе пресуда во корист на „Стрежево“ дека нема штета ЗК „Пелагонија“. На оваа пресуда се жалеше ЗК „Пелагонија“ до Апелациониот суд и во јануари 2022 година Апелациониот суд во Битола донесува пресуда со која пресудата од Основниот суд ја преиначува и донесува пресуда во корист на ЗК „Пелагонија“. На оваа пресуда „Стрежево“ поднесе барање за ревизија до Врховниот суд на РС Македонија. Во февруари 2023 година, Врховниот суд ја прифаќа жалбата на „Стрежево“, пресудата на Апелациониот суд се укинува и предметот се враќа на второстепениот суд на повторно судење. Во јуни 2023 година Апелациониот суд донесува пресуда со тоа што пресудата од Основниот суд ја преиначува и пресудува во корист на ЗК „Пелагонија“. На оваа пресуда „Стрежево“ повторно поднесува барање за ревизија до Врховниод суд.

Од јули 2023 година предметот е на повторно одлучување во Врховен суд.

Иако, ЈП „Стрежево“ настојува заостанатиот долг од каматите да се плати по спогодба ЗК „Пелагонија“ засега одбива да склучи таква спогодба.

-Во исчекување на Одлуката на Врховниот суд каде предметот е на повторно одлучување имаме препорака од страна на Владата да го искомпензираме преостанатиот долг по основ на камата со испорачана вода. По исплатениот долг во целост, судските трошоци и камати во износ од над 80 милиони денари, овој дополнителен потег на ЗК „Пелагонија“ единствено можеме да го разбереме како директен обид за тежок финансиски удар и загрозување на функционирањето на „Стрежево“, како и негово ставање во ќорсокак. Очекуваме ЗК „Пелагонија“ да ја почитува препораката на Владата за плаќање на преостанатиот дел од долгот по основ на камата преку испорачаната вода, а исто така очекуваме Апелациониот суд во Битола, во контекст на претходното, да ги земе предвид сите аспекти, и пред сè да го цени значењето на „Стрежево“, изјави денеска на прес-конференцијата, директорот на ЈП „Стрежево“ Менде Граматковски.