Вработените нема да може да одат на семинари, обуки и слични манифестации доколку не се вакцинирани. За ова, вели Миле Бошков, претседател на Бизнис конфедерацијата на Македонија, Владата не разговарала со нив, но она што е важно сега, е да се почитува националната политика за заштита на здравјето на населението.

– Во однос на потврдите за вакцинација што треба да се приложуваат, тоа е загрозување на човековите права на слобода на избор, на еднаквост, односно имаме поделба на вакцинирани и невакцинирани. Тоа е наш став во однос на универзалните човекови и работнички права. Но, ние сме партнери на Владата и ќе дејствуваме согласно дадените насоки, за да се спречи ширењето на пандемијата. Така, таму каде што е неопходно, ќе се бара вработените да бидат вакцинирани – вели Бошков.

Тој вели дека како Бизнис конфедерација и понатаму ќе работат на поттикнување безбедна средина, пред се преку информирање, преку дистрибуирање на информативни содржини за враќање на работа после ковид, како и стимулирање на работа од далечина, секаде каде што е можно.