Судијката во Основниот суд во Битола, Цветанка Никодиновска, денеска не дозволи снимање и фотографирање на судењето против поранешниот претседател на згаснатото бугарско здружение „Ванчо Михајлов“, Љупчо Георгиевски, иако новинарите имаа акредитација од Врховниот суд на Македонија, јави „Телма“.

Судијката ја игнорирала акредитацијата која на новинарите на „Телма“ и порталот „Сакам да кажам“ им ја додели Врховниот суд за да го следат судењето на Георгиевски.

Никодиновска го попречи известувањето на медиумите со тоа што забрани камери да влезат во Судот и побара да им бидат одземени мобилните телефони на новинарите, а забрани да ги користат дури и во холот на Судот, пред да почне судењето. Потоа, кога расправата беше при крај, таа ги спречи новинарските екипи на ТВ Телма и „Сакам да кажам“ да ја напуштат судница и се закани дека следниот пат нема воопшто да им дозволи да присуствуваат.

Во решението издадено од Врховниот суд пишува дека се одобрува снимање и фотографирање на судскиот процес по предметот К 289/23, а даденото одобрение од страна на Претседателот на Врховниот суд е со важност до завршување на расправата по предметот. Ако снимањето е одобрено, советот на главната расправа може од оправдани причини да одлучи одделни делови да не се снимаат, но никаде не е наведено дека целосно се забранува снимање на расправата.

На однесувањето на судијката денеска реагираше Здружението на новинарите на Македонија (ЗНМ), кое поднесе пријава до Основниот кривичен суд Скопје, како и до Здружението на судии, „со цел да се преземат соодветни мерки за одговорност за денешниот непримерен и непрофесионален однос од страна на судијката Цветанка Никодиновска од Основниот суд во Битола кон новинари и медиумски работници“.

„Иако новинарите имале дозвола од Врховниот суд на Македонија за медиумско покривање на случајот, оваа судијка го попречи нивното право на известување, со што се прекршија принципите на транспарентност и правото на јавноста да биде информирана”, пишува во соопштението на ЗНМ.

Здружението на новинари потсетува дека слободата на медиумите и правото на информирање се од фундаментално значење за демократијата, и дека ваквите постапки се неприфатливи и штетни за правната и медиумската слобода во државата.

„Ги повикуваме судските органи да преземат соодветни мерки за да не се повторуваат вакви инциденти и да го обезбедат почитувањето на професионалните права на новинарите и медиумските работници во заштитата на јавниот интерес”, соопштија од ЗНМ.