Mинатата недела Севиља ја освои Лигата на Европа со седмата победа во ова натпреварување, а сега една недела подоцна време е за второто европско финале.

Во Прага на „Еден арената“, Фиорентина и Вест Хем ќе водат битка за трофејот во Конференциската лига.

Навивачите на двата клуба долго чекаат на успех на своите миленици во европските натпреварувања, Вест Хем има два трофеи во своите клупски витрини (Куп на победниците на куповите и Интертото куп). Последниот го освоија во 1999 година, а воопшто последен финален натпревар им бил ФА Купот во 2006 година кога загубија од Ливерпул по изведувањето пенали.

Од друга страна прилика за трофеј Фиорентина имаше пред две недели, но беше поразена од Интер во финалето италијанскиот куп. Фиорентина на европски трофеј чека повеќе од шест децении, последен пат триумфираа во Купот на победниците на куповите во 1961 година.

Натпреварот е важен и затоа што победникот наредната сезона ќе игра во групната фаза од Лигата на Европа, преку првенствата ниту Вест Хем, ниту Фиорентина не обезбедија место во европските натпреварување. Фиорентина во Серија заврши на осмата позиција, додека Вест Хем беше 14-ти во Премиер лигата.