Бирото за развој на образование (БРО) го избриша линкот кој води до содржината на работните листови за „Образование за животни вештини“ каде во делот за личен развој се поставуваат прашања „Што сметате дека ја предизвика вашата хетеросексуалност?“, „Дали хетеросексуалноста е фаза којашто ќе ја надминете?“, „Ако хетеросексуалноста е нормална, тогаш зошто толку многу хетеросексуалци се лица со ментални нарушувања“?.

Автор на работните листови е Ерик Џост, активист и обучувач на Адвокати за млади (Advocates for Youth), а учебникот е одобрен од БРО.

Овие материјали предизвикаа бурни реакции во јавноста.

Пасторот на Евангелската црква Филип Иванов на неговиот „Фејсбук“ профил напиша дека прашањата се манипулативно формулирани и насочени кон децата.

Поради ова, а и еден куп други нешта, апел до вас родителите: обрнете поголемо внимание на своите деца, внимавајте што им се сервира како нормално, бестрашно предизвикајте ги „авторитетиве“ и дајте им до знаење дека нашите деца се наши деца, не ѝ припаѓаат на државата или на родовите идеолози кои сакаат да експериментираат со психата, односно душите на децата и младите, пишува Иванов.

Д-р Александар Митов, кој преку Фејсбук го повика министерот за образование Јетон Шаќири да ѝ даде објаснување на јавноста прашува дали ова се вредностите на партијата?

Просто се решени да тераат агенди спротивни на волјата на 90% од населението. А едно друго прашање од “учебников“, пак, вели, од кај знаеш дека хетеросексуалноста не ти е САМО ФАЗА? Демек, да се предомисли детето. Не можам да поверувам колку тенденциозно е пишувано, со јасна намера да ги збуни децата, да ги тера во тој правец, напиша д-р Митов.

„Слободен печат“ испрати прашања до Бирото за развој на образованието  и до објавување на текстот немавме одговор. Очекуваме во текот на денот да дадат објаснување за содржината на работните листови.