Втор натпревар и нов пораз за кошаркарите на Куманово 2009 во новото издание на Балканската лига. Уште еднаш на домашен терен, овојпат подобри од нив беа играчите на Галил Елион од Израел со 87:96.

Галил Елион за два дена славеше две победи, претходно совлада уште еден македонски претставник, во Скопје триумфираше и над ТФТ со 75:83.

Една силна четвртина беше доволна за Израелците да ја преземат контролата на мечот со Куманово. Во почетните 10 минути остварија двојно поголемо водство од (26:13), кое со сигурна игра го одржуваа во продлжението на играта, а на паузата нивната разлика стана поголема (48:34).

Резултатски, потполно рамноправни беа кумановци во вториот дел од играта. Не дозволија противникот да направи уште поглема разлика од онаа по 20 минути од играта. На „минус 10“ негатива односно (57:67) беа во 29 минута. Но, не направија уште посериозен чекор за целосно враќање во дуелот. На две минути пред крајот на средбата, Куманово 2009 стигна најблиску до 82:91, но остана премалку време за дефинитивно враќање.

Моментно на табелата во групата „А“ води Галил Елион со шест бодови, следуваат ФМП Академија (три) и Куманово (два), еден има Балкан од еден одигран натпревар, а Лукоил Левски и Макаби Хаифа на 3 и 4 ноември треба да ги имаат првите свои мечеви во групната фаза.

Во следниот период, кумановци ги чека мини гостување, односно двојна програма во Бугарија. Прво, на 9 ноември играат против Балкан во Ботевград, а два дена подоцна, во Софија, домаќин им е екипата на Левски.