Сите членови на потесното семејство на македонската министерка за енергетика и рударство, Сања Божиновска, се носители на бугарски пасоши, објави бугарски БГНЕС, повикувајќи се на извори во Министерството за правда во Софија. Таткото Перо, мајката Виолета и братот Даниел, како и самата Сања Божиновска, се бугарски државјани, тврди бугарската новинска агенција.

Тие поминале низ стандардната процедура, односно ги докажале своите бугарски корени и ја декларирале својата бугарска самосвест, пишува БГНЕС.

Божиновска неколкупати тврдеше дека имала бугарско државјанство, но и дека од него се откажала, а сето тоа се случувало „одамна“. По ова, БГНЕС минатата недела објави дека на Божиновска не ѝ е издаден указ за ослободување од државјанството, што значи дека таа и натаму е бугарска државјанка. Според БГНЕС, македонската министерка барањето за отпуст од државјанството го поднела минатиот месец.

Поднесувањето барање за ослободување од бугарско државјанство не води до автоматско завршување на постапката. Тоа се прави преку посебен декрет и важи и за сегашните бугарски државјани родени во странство и за Бугарите кои се родени на територијата на денешна Бугарија.

„За конкретното лице (Божиновска) до денес не е издаден указ за ослободување од државјанство. Издавањето на таков се врши по темелна проверка за секаков вид на обврски на барателот. Потврдата, вклучително и данокот и имотот, се однесува на сите земји каде што престојувало лицето. Надлежните институции проверуваат и за можни кривични постапки“, велат изворите на БГНЕС во Министерството за правда.

Божиновска, одговарајќи на новинарско прашање за тоа дали со барањето се откажала и од својата бугарска самосвест, која ја декларирала при добивањето на државјанството, минатата недела рече дека „ќе се консултира со својот адвокат“, па ќе одговори.