Mакедонската министерка за енергетика Сања Божиновска сè уште е бугарска државјанка, објави БГНЕС.

Според информации од извори на агенцијата БГНЕС во Министерството за правда, кои сакале да останат анонимни, на Божиновска не ѝ е издаден указ за ослободување од бугарското државјанство.

Божиновска неколкупати изјавуваше дека поднела барање за откажување од државјанството. Таа тврди дека има само македонско и чешко државјанство и дека нема бугарски лични документи. На новинарско прашање околу тоа дали со барањето се откажала и од бугарската самосвест, чие декларирано присуство е предуслов за добивање на државјанството, таа рече дека ќе се консултира со адвокатот, па ќе одговори.

Според „експерти од Министерството за правда во Софија“ на кои се повикува БГНЕС, постапката за откажување од бугарско државјанство не завршува со поднесувањето барање. Оттаму потсетуваат дека добивањето бугарско државјанство се заснова на доставени документи за бугарско потекло и лична пријава за присуство на бугарска самосвест кај кандидатот, пишува бугарскиот медиум.