Телевизиската презентерка, 28-годишната дебранка Бесмира Ејупи е предложена да седне во фотелјата на Генералниот конзулат на Северна Македонија во Њујорк, САД. Владата завчеравечер, на затворена седница, на предлог на Министерството за надворешни работи (МНР), го утврдила предлогот Ејупи да биде нашата нова конзулка во Њујорк, на местото на актуелниот Јордан Панев, кому му истекува мандатот.

Од Владата велат дека не можат да ја потврдат информацијата, бидејќи одлуката била донесена на затворена седница. Од МНР за „Слободен печат“ ниту ја потврдуваат ниту ја демантираат информацијата дека презентерката ќе биде новата конзулка во Њујорк.

– Кривично дело е објавување информација од затворена владина седница и тоа е казниво од 2 до 5 години затвор – велат од МНР.

Ако САД го одобри предлогот, Ејупи без проблеми ќе замине во Њујорк, бидејќи именувањето конзули е во надлежност на МНР и на Владата, зашто за конзулските позиции не се прашува претседателот на државата. Од кабинетот на претседателот Стево Пендаровски информираат дека постапката за именување генерален конзул на Република Северна Македонија во странство, не е во надлежност на претседателот на државата туку е во надлежност на МНР и Владата, што е регулирано со Законот за надворешни работи.

– Постапката за именување генерален конзул ја започнува министерот за надворешни работи, кој до Владата доставува предлог за именување генерален конзул. По прифаќање на кандидатот од страна на Владата, Министерството бара егзекватура од земјата на приемот, а по нејзиното добивање и завршените подготовки, Владата донесува одлука за именување на генерален конзул. Патентното писмо за генералниот конзул, онаму каде што е потребно, го парафира министерот, а го потпишува претседателот на Владата – велат од кабинетот на Пендаровски.

Тоа што може да се најде за Ејупи е дека таа во 2020 година конкурирала, но не станала член на Комисијата за спречување и заштита од дискриминација. Тогаш во испратената документација од Ејупи до Собранието, може да се види дека за член на Комисијата конкурирала од позиција новинар/презентер. Таа навела дека работела во повеќе телевизии, меѓу кои Нова, Алсат-М и ТВ21. Ејупи магистрирала казнено право на Универзитетот ФОН, дипломирала меѓународна комуникација на Штуловиот универзитет, таа е „уважен амбасадор на животна средина“ и има меѓународен сертификат за познавање англиски јазик. Таа навела дека одлично комуницира на албански и на македонски јазик, како и дека поседува повеќе вештини, како способност за решавање ад хок проблеми, лидерски вештини и др. Ејупи навела и дека не е член на ниедна партија.

Освен Ејупи, Владата неодамна донела одлука за испраќање на Петри Муслиу за генерален конзул во Чикаго. Инаку, Петри е син на аналитичарот Алберт Муслиу. Според поранешни функционери во МНР, претходно вообичаена практика било за позицијата конзул да се испраќаат кариерни дипломати, односно луѓе од МНР.

Се шпекулира дека и Ејупи и Муслиу ги заслужиле конзулските позиции поради блискост со функционери на ДУИ.