Од Беса им одговорија на заменик претседателот Аријанит Хоџа и на пратеникот Бастри Бајрами з аодлуката да се дистанцираат од партијата и да формираат нова политичка формација. Генералниот секретар на Беса, Абдуш Демири за „Слободен печат“ потегот на Хоџа и Бајрами го смета за лична одлука на довчерашните сопартијци и порачува дека опозицискиот фронт се окрупнува и ќе ја победи ДУИ.

– Од социјалните мрежи сме информирани за односот на Арјанит Хоџа и Бастри Бајрами дека се дистанцираат од опозицискиот фронт. Тоа е нивна лична одлука, најголем дел од партиските тела и структури се со апсолутно мнозинство за влез во опозицијата и испраќање на ДУИ во опозиција. Се чини дека здружената опозиција некому му пречи, но залудни се напорите да се спаси ДУИ. Албанската опозиција секој ден се повеќе се обединува, а на следните избори ќе излезе како победник, што покажува и последната анкета – вели Демири.