Шефицата на германската дипломатија Аналена Бербок оцени дека разговорите меѓу американската и украинската делегација во Џеда се важен чекор во потрагата по траен мир и безбедност.

„Резултатите од украинско-американските преговори би можеле да бидат важна пресвртница во потрагата на Украина за траен мир и безбедност. Германија, заедно со нашите партнери, ќе го поддржат украинскиот народ на овој пат. Сега на Русија е да стави крај на својата агресивна војна“, напиша таа на социјалната мрежа Х.

По разговорите меѓу украинската и американската делегација во Џеда, Саудиска Арабија, во вторникот, Украина изрази подготвеност да го прифати предлогот на САД веднаш да воведе 30-дневен прекин на огнот.

Делегациите на Украина и Соединетите Американски Држави се договорија веднаш да започнат преговори за постигнување траен мир, како и да го одредат составот на нивните тимови.

По разговорите со украинската делегација во Саудиска Арабија, американскиот државен секретар Марко Рубио изјави дека „топката сега е на теренот на Русија“.