Избришан од Централен регистар на Македонија, бугарскиот клуб „Ванчо Михајлов“ со седиште во Битола приреди провокација во пресрет на денот на ослободувањето на градот и токму затоа доставив поднесок до Основното јавно обвинителство, вели Весна Бендевска, потпретседател на македонското Собрание.

Според Бендевска, провокациите на непостоечкиот, а сепак според информации во јавноста активен бугарски клуб „Ванчо Михајлов“, се насочени против националните чувства на македонскиот народ.

– Се обратив до Основното јавно обвинителство во Битола за да прашам дали државните институции можат да најдат начин на кој ќе го забранат дејствувањето на здружението на граѓани со фашистичко име. Доколку има индиции, веднаш ќе поднесам кривична пријава против Љупчо Ѓоргиевски, поранешен претседател на поранешното здружение што е избришано од регистарот – изјави Бендевска за МИА.

Според Бендевска, провокацијата на непостоечкото здружение е поврзана со тврдењата искажани на настан во клубот „Ванчо Михајлов“ а пренесени во јавноста, во кои се посочува дека Војдан Чернодрински е бугарски преродбеник, а „Македонска крвава свадба“ дека е дел од бугарското културно наследство.

Во очекување на реакција од Основното јавно обвинителство Битола, потпретседателката на македонското Собрание Весна Бендевска собира и дополнителна документација со цел доследно почитување на одлуката на Централен регистар

Бугарскиот клуб на 1 ноември, три дена пред прославата на 80 години слободна Битола, одржа настан на кој ги славеше бугарските преродбеници. Собирот беше во објектот на улица „Рузвелтова“ каде во 2022 година беше сместено здружението кое сега е непостоечко, а на фасадата надвор уште се вее бугарското знаме.

Говорниците рекоа дека Војдан Чернодрински е бугарски преродбеник, „Македонска крвава свадба“ дел од бугарското културно наследство и олицетворение на борбите и стремежот за слобода на Бугарите. Говорникот Калин Крумов рече: „Сижето е познато, двајца млади се вљубуваат, Турците ја грабаат девојката, а Бугарите се спротивставуваат“.