Фудбалерот на Реал Мадрид, Џуд Белингам изјави дека не е срамота да се загуби од Ливерпул и дека англискиот тим сакал да победи во петтото коло од Лигата на шампионите.

Актуелниот шампион Реал синоќа на „Енфилд“ загуби од Ливерпул со 0:2, со головите на Алексис Мекалистер и Коди Гакпо. Ливерпул е единствениот тим кој оствари пет победи во ЛШ оваа сезона и ја постигна првата победа против Реал по 15 години.

– Тие сакаа повеќе од нас, да бидам искрен. Ова е лош резултат против тимот кој игра најдобро во Европа. Не е срамота да дојдеш овде и да загубиш, но ние сме разочарани од начинот на кој игравме – изјави Белингам.

Двата тима промашија пенали, Мохамед Салах во Ливерпул и Килијан Мбапе во Реал.

– Тие ја контролираа играта од првата минута. Не успеавме да го искористиме поседот на топката. Кога успеавме да ја добиеме топката, премногу пати се обидувавме да нападнеме. Тие нѐ држеа дефанзивни, па не можевме да им се заканиме – рече Англичанецот.