Белата куќа денес побара итна истрага откако ескалаторот што го користеа претседателот на Соединетите Американски Држави Доналд Трамп и првата дама Меланија Трамп при пристигнувањето на Генералното собрание на ОН наводно запрел.

Портпаролката на Белата куќа, Каролин Левит, изрази загриженост на социјалните мрежи, нагласувајќи дека ако инцидентот бил намерен, одговорните ќе мора да бидат отпуштени и веднаш истражени, пишува CNN.

„Ако некој во ОН намерно го запрел ескалаторот додека претседателот и првата дама се качувале по него, мора да биде отпуштен и веднаш истражен“, напиша Левит на X, споделувајќи видео од британскиот весник „The Times“.

Во статијата се вели дека вработените во ОН наводно се шегувале дека ќе ги исклучат ескалаторите и лифтовите за да му кажат на Трамп дека „нема пари“ и дека мора да се качува по скалите.

За време на говорот на Генералното собрание на ОН, Трамп го спомена дефектот, шегувајќи се за „не многу мазниот прием“.

„Ова се двете работи што ги добив од Обединетите нации: лош ескалатор и лош телесуфлер“, рече Трамп.