Американскиот претседател Доналд Трамп денес потпиша претседателски меморандум за национална безбедност (НСПМ) за заострување на политиката на Соединетите Американски Држави кон Куба.

„Овој НСПМ ја обновува и зајакнува силната политика кон Куба од првиот мандат на претседателот, менувајќи ја политиката на администрацијата на Бајден за намалување на притисокот врз кубанскиот режим“, се вели во соопштението на Белата куќа.

Се забележува дека НСПМ ги прекинува економските практики „кои непропорционално им користат на кубанската влада, војската, разузнавањето или безбедносните агенции на сметка на кубанскиот народ“.

Меморандумот, исто така, предвидува законска забрана за американски туризам во Куба и наложува водење евиденција за сите трансакции поврзани со патувања најмалку пет години.

„НСПМ го поддржува економското ембарго врз Куба и се спротивставува на повиците во Обединетите нации и другите меѓународни форуми за негово укинување“, соопшти Белата куќа, истакнувајќи дека претседателскиот меморандум има за цел да го поддржи кубанскиот народ преку проширување на интернет услугите, слободниот печат, слободното претприемништво, слободното здружување и легалното патување.