Апелациониот суд во Штип ги одби како неосновани жалбите на поранешниот министер за економија Крешник Бектеши и ексградоначалниците на Кочани, Николчо Илијев и Ратко Димитровски.

Со оваа одлука, Бектеши останува во притвор, а Илијев и Димитровски во куќен притвор. Тројцата се осомничени во истрагата за трагичниот пожар во дискотеката „Пулс“ во Кочани, во кој животот го загубија 62 млади луѓе.

Во притвор останува и поранешната државна секретарка во Министерството за економија, Размена Чекиќ Дуровиќ, која ставила потпис на втората лиценца за вршење на угостителска дејност на дискотетката.

Судот денеска одлучуваше по жалби на осуммина осомничени, а прифати само една – мерката куќен притвор му се заменува со мерки на претпазливост на еден од осомничените, инспектор во Државниот пазарен инспекторат во Виница.