Министерот за економија Крешник Бектеши потврди дека се при крај анализите за враќање на дневната евтина тарифа на струјата уште летово. Тој додаде дека секаде каде што државата може да го преземе товарот, тоа ќе биде сторено, како одговор на прашањето дали ќе се врати ДДВ од 18 отсто на струјата.

Според Бектеши, поголемиот дел од предложените енергетски мерки на Стопанската комора на Македонија се прифатливи и сè што е во доменот на неговиот ресор ќе биде поддржано за да бидат граѓаните и стопанството добро снабдени со енергенси. Деветте предлог мерки што државата треба да ги преземе за да се поддржи економијата во енергетска криза се испратени од СКСМ до сите државни и јавни институции што имаат надлежност во енергетиката, а произлегоа од неодамнешниот состанок на Македонската енергетска асоцијација.

– Веќе ги олеснивме процедурите за фотоволтаични централи и работиме и на сите други мерки пред новата грејна сезона – рече Бектеши, коментирајќи еден од предлозите на СКСМ за тоа евтината струја од фотоволтаиците, да ја купува АД ЕСМ, наместо производството на поскапа електрична енергија од термоелектраните.