Министерот за економија Крешник Бектеши најави дека мерката „гарантирана цена“ ќе продолжи во трговијата најмалку уште еден месец, односно и во текот на јануари. Одлуката беше предвидено да заврши на 31 декември годинава, но замрзнатите цени ќе се практикуваат се додека не биде донесен Законот за нефер трговски практики, посочи министерот во „Студио 10“ на ТВ24. Според Бектеши, новиот закон ги регулира односите помеѓу произведувачите, дистрибутиерите и продавачите и со тоа ќе се намалат цените, така што нема да има потреба понатаму да има замрзнати цени.

-Ќе имаме финална средба со трговците и согласно податоците кои ги видовме, мерката ќе продолжи најмалку уште еден месец, бидејќи Законот за нефер трговски практики ќе применува од почетокот на следната година. Во јануари ќе важат мерките за гарантирана цена и да се надеваме дека Собранието ќе го усвои Законот за тој да почне да се применува од почетокот на 1 февруари – нагласи Бектеши и додаде дека за ова утре ќе се дискутира и на владина седница.