Хаотичната тарифна политика на Белата куќа го гаси апетитот на пазарот за американски средства. Странските инвеститори купија рекорден број јапонски акции и обврзници во април, откако одлуките за тарифи на Доналд Трамп за „денот на ослободувањето“ одеднаш го претворија Токио во глобално засолниште за да се намали изложеноста на американскиот долар. Податоците објавени оваа недела од страна на јапонското Министерство за финансии покажаа дека минатиот месец, кога екстремната нестабилност ги зафати пазарите, а американскиот долар ја изгуби вредноста, странските инвеститори беа нето купувачи на јапонски хартии од вредност во вредност од 8,2 трилиони јени (57 милијарди долари), објави „Фајненшл тајмс“.

Ова е најголемиот откуп на јапонски средства од 2005 година, кога се води статистика, и три пати над 20-годишниот просек за април. Невидениот бран на купувања од страна на странските инвеститори вклучуваше нето купувања на акции во вредност од 25,5 милијарди долари, најмногу од април 2023 година, и долгорочни обврзници во вредност од 31,5 милијарди долари, што е највисок износ од јули 2022 година.

Трговците веруваат дека вкупниот износ веројатно е зголемен од одлуките на глобалните централни банки да купуваат јапонски државни обврзници. Јуџиро Гото, главен стратег за девизен курс во „Номура“, изјави дека купувањата на јапонски долгорочен долг „значително ги надминале“ сезонските трендови и се издвојуваат по тоа што се случиле заедно со порастот на инвестициите во акции. Тој рече дека странските инвеститори можеби ги пренасочуваат доларите кон Јапонија како дел од трендот на „дедоларизација“ и дека ја гледаат азиската земја како логичен избор поради големината и релативната стабилност на пазарот, пренесува Пословни дневник.