Фудбалерот од средниот ред на Барселона, Френки де Јонг изразил желба да ја продолжи соработката со каталонскиот клуб и моментно е во преговори за нов договор, пренесува Атлетик.

Важечкиот договор меѓу холандскиот интернационалец и Каталонците е со важност до 2026 година.

Раководството на Барса одлучи следната сезона да ја започне без играчи чии договори истекуваат во следните 12 месеци.

На почетокот на 2024 година клубот испрати предлог до таборот на 27-годишниот играч од средниот ред за продолжување на договорот, но тогаш немаше одговор. Во моментов двете страни потврдуваат дека преговорите се обновени.

Поранешниот играч на Ајакс оваа сезона забележа 29 настапи, иако претходно помина низ тежок период поради тешката повреда на скочниот зглоб поради која не настапи на Европското првенство во Германија 2024.