Претседателот на САД Џо Бајден ги откажa најавените посети на Австралија и на Папуа Нова Гвинеја поради ситуацијата со американскиот државен долг, односно тековните преговори за долгот на федералните власти во САД, потврди денес Белата куќа.

Прес секретарот на Белата куќа, Карин Жан-Пјер, во изјавата рече дека Бајден претходно денес разговарал со австралискиот премиер Ентони Албаниз за да го информира дека ќе го „одложи“ патувањето и го покани премиерот на официјална државна посета „во време што треба да се договори од тимовите“.

Жан-Пјер додаде дека „тимот на претседателот се ангажирал“ со премиерот на Папуа Нова Гвинеја, јави „Си-ен-ен“

Бајден сепак ќе патува во Јапонија утре, како дел од она што требаше да биде еднонеделно патување низ регионот на Пацификот.

Претходно денес, координаторот на Советот за национална безбедност за стратешки комуникации, Џон Кирби, им рече на новинарите дека Белата куќа ги преиспитува посетите на Папуа Нова Гвинеја и Австралија.

„Она за што можам да зборувам е Г7 и одење во Хирошима. Претседателот со нетрпение го очекува тоа. Го разгледуваме остатокот од патувањето“, им рече Кирби на новинарите.

Откажувањето стапи додека лидерите на конгресот се состанаа со Бајден во Белата куќа за да разговараат за лимитот на долгот.