Администрацијата на Џо Бајден изјави дека очекува од Саудиска Арабија да го „промени својот пристап“ спрема САД и наговести дека сака да го намали секој директен контакт меѓу претседателот и престолонаследникот Мохамед бин Салман.

Овој став следи додека разузнавачките служби се подготвуваат да го објават декласифицираниот извештај на Конгресот кој ќе ја опише нивната проценка за наводната вина на престолонаследникот за убиството на американскиот новинар за „Вашингтон пост“, Џамал Кашоги кој во Истанбул беше убиен од саудиските власти во 2018 година, пишува Гардијан.

Портпаролката на Белата куќа, Џен Псаки на новинарското прашање дали Бајден ќе разговара со Мохамед бин Салман одговори дека новиот претседател планира да ги „рекалибрира“ американските односи со Саудиска Арабија и дека за свој колега во таа земја го смета кралот Салман, а не принцот Мохамед.

– Од почетокот јасно ставивме до знаење дека ќе го рекалибрираме нашиот однос со Саудиска Арабија. И дел од тоа е враќање на ангажманот колега со колега. Колегата на претседателот е кралот Салман и очекувам дека со време, тој ќе разговара со него. Не ми е позната временската рамка кога тоа ќе се случи, рекла таа.

Иако тоа е технички точно, за 35-годишниот принц се смета дека управува со Саудиска Арабија и дека има директни односи со другите странски лидери.

Си-Ен-Ен овој потег го опишува како „остар удар по брадата“ кој Бајден му го зададе на Бин Салман.

Без разлика дали се работи за строг протокол или за вистински обид да се намали значењето на Мохамед бин Салман, тој потег го одразува јавното неодобрување на Бајден за однесувањето на престолонаследникот за кого ЦИА заклучи дека знаел за плановите кои резултираа со убиството на Кашоги во октомври 2018 година.

За време на претседателската кампања, Бајден изјави дека спрема Саудиска Арабија тој ќе се однесува како спрема „отпадник“.

Извор: Блиц.рс